擺低物件，回眸一望: 花時間搵嘢，最大嘅傷害，唔係浪費時間，而係嗰種激氣──「啲嘢轉頭就唔知去咗邊，總之要嗰樣，無嗰樣！」每日都嬲自己，再加上經常畀人批評無交帶、唔可靠，畀人鬧再加上心裏面自己鬧自己，日積月累，對自我形象嘅傷害，其實十分巨大。所以，解決經常唔見嘢呢個問題，係非常重要嘅。其實之所以唔見嘢，個關鍵位就在於物件離開手嘅一刻。好多人嘅壞習慣，就係用最短嘅時間將物件放低，然後趕住做另一件事，無預留任何空間，比腦袋記得物件放喺邊。從今日起，嘗試喺放低物件之後，總係「回眸一望」，好讓腦袋可以記低物件嘅位置（回眸，唔係回頭，因為回頭動作就太大，唔夠優雅；回眸，望一眼，就啱啱好）。
同類物件，擺埋一齊: 終於等到上體育堂，終於等到放學後可以打波，可以走出班房活動一下，本來係一件開心事。但好多時最掃興嘅，就係換衫準備落場嘅時候，發現自己原來帶漏野，例如冇拎護脛，落唔到場踢足球比賽；無著排球褲，只可以喺觀眾席做啦啦隊。返學前，明明已經用盡力執齊運動袋，但始終永遠都係漏一兩樣野。咁點樣解決呢？就係「擺埋一齊」。要一齊用嘅物件，收納嘅時候，佢哋永遠都要「擺埋一齊」。踢完波之後，護脛立即放喺鞋袋裏面，先至離開球場；到第二朝球鞋球襪洗完晾乾之後，即刻放返入鞋袋裏面。著上腳嗰三樣嘢，永遠都要擺埋一齊，放喺個鞋袋裏面。每個星期踢波，都係咁樣做，直到永遠。
儲存物件，同一地方:每一個人，不論係返工嘅成年人，定係返學嘅小朋友，每日要用嘅物件，至少都有數十樣。要記得每一樣物件，例如鎖匙、計數機、書本及水樽等等放喺邊個位置，的確需要耗用腦袋好多能量。每件日常用嘅物件，永遠放喺同一個地方，相比起隨手隨心擺放，表面看來，好似係用多咗時間，亦「好煩」，例如英文書永遠要放喺上格，中文課本要放下格，而唔係溝亂隨便叠喺書檯上。但其實將物件永遠放喺同一個地方，咁樣喺需要用嘅時候，就唔使諗佢放喺邊，省卻搵嘢嘅時間，咁就可以準時又輕鬆咁出門口返學、準時上到校車（唔使搭的士）、夜晚又可以早啲瞓覺啦。
撰文︰崔永豪醫生
原文刊載於 專注不足/ 過度活躍症（香港）協會FB
