做事，一心一用: 一邊上網課、一邊喺手機回覆短訊、另一邊單邊耳筒其實聽緊podcast，好容易畀我哋有個錯覺：以為自己精於multi-tasking，係時間管理達人，沾沾自喜。心諗：「人哋三樣嘢，一樣還一樣輪流做，要用3小時，你睇！我一個鐘頭，就做晒三樣嘢。」但其實，只要有人畀一張白紙你，叫你將頭先嘅網課、聽嘅podcast內容寫番出嚟，而頭先短訊又傾咗啲乜……就會發現，乜都寫唔出，一片空白。時間用咗，但係勞而無功，毫無得著，正正係一心多用最大嘅問題。情況有如小朋友嗰版抄書功課，比年幼嘅細佬妹用擦膠擦晒，真係喊都無謂。其實，平日我哋做任何事，包括做功課、上課、同人傾偈、食飯同行路等，都要一心一用，咁樣先有得著。另外，一心一用，其實需要我哋動腦筋，每當自己心神想遊走嘅時候，俾少少力hold on。正所謂日子有功，我哋嘅專注力，就係咁樣練就而成，情況就好似每日用手舉啞鈴 ，鍛煉隻老鼠仔一樣。希望大家都可以成為專注力嘅大力士。
做事，一擊即中: 要喺限定時間內，完成一篇寫作功課，或一張數學工作紙；因為自己想做得好，好容易就心急起嚟，尤其係當腦袋開始疲倦，專注力下降時，就更加容易陷入一個困境：匆匆忙忙落筆，然後寫錯，又要花時間用擦膠、塗改液去改錯，咁樣唔單止激氣，仲連僅餘嘅時間都消耗埋。欲速則不達（孔子真係冇講錯）！做功課答問題時快而準，大家都想，問題係點先可以做到呢？ 提醒自己，要一擊即中。運用之前講過嘅好習慣，包括將心神都放喺一呼一吸，以平靜心神，然後一心一用，腦海裡面，有一幅圖畫：簡單如寫一個中文字，喺腦海內要有呢個中文字嘅高清畫面；寫每一筆時，有如一個威風凜凜嘅弓箭手，要全神貫注，有的放矢。先求準確，到一切上軌道後，再求增加速度。
做事，一氣呵成: 一篇150字嘅作文，喺課堂上專心做，30分鐘就做好，之後體育堂就可以盡情去玩。但係過去一年，在家網上學習，就好容易跌入一個陷阱 ：寫兩行，然後離開座位，上5分鐘社交網站，然後返埋位，又寫兩行。結果，之前喺學校課堂上，30分鐘就可以完成嘅150字作文，而家居然3個鐘後都完成唔到。原本諗住做完之後，可以同爸爸落街去踩陣單車，最後都因為做唔切啲功課而被迫取消…… 點解一氣呵成係咁重要呢？因為做功課，尤其係寫作，好需要喺腦海中構築思路，思路一被打斷，就無可能再流暢地寫落去，結果寫每一句，以至每一粒字，都搞到舉步維艱。著名嘅番茄工作法（Pomodoro Technique） ，建議我哋將工作分成25分鐘一件，中間休息5分鐘，完成四五件，就休息長啲。 25分鐘工作時間，務求一氣呵成，無間斷。咁樣唔單止可以提高效率，亦會好似「一心一用」咁，鍛鍊自己嘅專注力。
撰文︰崔永豪醫生
原文刊載於 專注不足/ 過度活躍症（香港）協會FB
