每日返工返學，人哋對自己有期望有要求，自己對自己，亦都有期望有要求。要處理每日逼到埋身嘅壓力，就一定要識耍以下2套減壓功夫。
不過，喺我地講呢兩套功夫之前，先要明白，我哋每日感受到嘅精神壓力，其實係啲咩嚟嘅呢？
首先，當腦袋將當下一刻嘅情況，理解為對自己有威脅嘅時候，腦袋內嘅警鐘，就會響起，身體收到呢個警號，就會釋放壓力荷爾蒙（包括腎上腺素 adrenaline 同皮質醇 cortisol），令自己進入作戰狀態，呢個時候，我地就有「受壓」嘅感覺，包括情緒緊張、焦慮、憤怒；思想嘅反應就係大大提高警警覺，不停動腦筋應對當前威脅；身體嘅反應就包括心跳呼吸加速、血壓上升同肌肉繃緊等等。行為方面，一係就同佢打個，一係就走開逃避，若果預計又打唔贏，又走唔甩嘅話，就會嚇到個腦hang咗機，成個人呆咗。相信大家每日返工返學，都經歷過呢啲身心反應。
強韌嘅身心，有助我地處理壓力，而強韌嘅身心，係可以鍛鍊返嚟嘅。大家試吓每日都做以下兩件事，好似人哋日日練功咁樣，正所謂日子有功，慢慢就會見到成效。
用眼睛親親大自然
有門學科，叫Ecopsychology，係叫人在精神上更接近大自然，以治療人嘅精神痛苦。
在今日嘅世界，Ecopsychology 越來越重要，因為我地嘅日常生活，越來越多被室內環境、電子產品、以至虛擬世界所佔據。明智嘅做法，就係主動地積極地恢復與大自然嘅聯繫，以改善我地嘅身心健康。
眼睛係靈魂之窗，所以透過我哋嘅眼睛，可以有效地幫我哋嘅腦袋同大自然聯繫。醫學研究發現，置身於大自然中，用眼看大自然，大自然的光線進入眼睛，能夠促進腦袋血清素 （serotonin）嘅傳遞，尤其是我地腦袋中掌管理智嘅部份 ，即係我哋腦袋嘅前額葉 （prefrontal cortex）同埋我哋腦袋嘅警鐘 （即係杏仁核，Amygdala） 之間嘅血清素傳遞，從而令到個警鐘可以停落嚟，令焦慮恐慌情緒漸漸消散。腦袋裏面，血清素嘅傳遞 對我哋嘅情緒係好重要㗎。抑鬱症裏面，腦袋裏面血清素嘅傳遞減弱咗，抗抑鬱藥，其中一個作用就係促進腦袋裏面血清素嘅傳遞，以改善情緒，所以眼睛接觸大自然嘅光線，就係天然嘅抗抑鬱良藥。
一講起親親大自然，大家就會諗，要返工返學咁忙碌，邊度咁多時間去郊外海灘呢？其實我地只要每日吸收一D，積少成多，就能夠從大自然中，吸收足夠有助於精神健康嘅養分。研究發現，每星期累積夠120分鐘置身於大自然嘅時間，就能夠明顯改善身心健康。
即使身在香港市區，我地仍然可以喺公園，以至喺商業區的公共空間，見到不少樹木。我自己就有個習慣，就係戴一副有防紫外線鏡片嘅眼鏡，舉頭欣賞樹葉，以及樹葉之間的藍天白雲。返工之前10幾分鐘，或者午飯期間抽10幾分鐘，再加埋週末週日多少少時間，咁就累積夠一星期120分鐘㗎啦。
至於另一套好值得每日都做嘅減壓功夫，就係腹式呼吸
腹式呼吸練習，就係吸氣嘅時候肚皮鼓起，呼氣嘅時候肚皮縮番入去，每一個呼吸都變得深而且慢。
點解肚皮郁動，都居然會影響到我哋嘅腦袋嘅呢？原因係我地嘅神經系統，不僅僅只有腦袋。之前我提到當腦袋判斷周遭環境有威脅時，腦袋內嘅警鐘響起，然後心跳加快，呼吸加速，血壓上升，肌肉繃緊，呢D一連串嘅反應，是因為腦袋警鐘啟動咗我哋嘅交感神經系統（Sympathetic Nervous System）。而當威脅解除嘅時候，就需要副交感神經系統（Parasympathetic Nervous System）採取行動，以減慢返我哋嘅心跳同埋呼吸，放鬆返我哋嘅肌肉。呢個交感神經系統，係由我哋嘅腦部同埋脊髓，伸延到全身嗰部份。
當我地受到太頻繁和太長時間嘅威脅，交感神經系統過度活躍，副交感神經系統卻太長時間處於休眠狀態，這兩個功能相反嘅系統，就會失去平衡，例如搞到自己即使放咗工放咗學，個人已經離開咗充滿壓力嘅環境，但情緒依然平復唔到過嚟，心跳呼吸仍然係好快，個人心慌慌咁樣。
腹式呼吸練習，令到每一次呼吸，都變得好深入，而且緩慢 （每分鐘 6至10次呼吸），令心臟以及肺部探測血壓和空氣壓力嘅部份，受到刺激，進而啟動副交感神經系統（Parasympathetic Nervous System），幫我地嘅身體去放鬆。
大家可能又會話，返工咁忙，邊度有時間做呢啲呼吸練習呢？其實同親親大自然一樣，每日都做少少，積少成多，就會見到成效。我自己就習慣，最少在早上做10次腹式呼吸，然後晚上再做多10次，咁樣，每日都係用大約三分鐘嘅時間。唔使花好長時間，重點就係每日都做，寧願時間短啲，都唔好斷開有幾日冇做。因為咁樣係最有效嘅方法，去訓練我哋嘅神經系統。每日都做呢兩套功夫，就能夠有效咁紓緩我地嘅精神壓力。
撰文︰崔永豪醫生
本文摘自以下影片：
