半年前，女儿只身出外留学。这半年来，父母寝食难安。今天，看完女儿这封电邮後，他们放心了，因为知道女儿开始长大了。
「阿爸丶阿妈：
成个星期『潜咗水』无覆你哋，知你哋担心我，sorry。因为我想专心写呢封信俾你哋，分享我喺呢度嘅一个奇遇。
呢两个月，我见咗学校嘅辅导员，佢嘅办公室好整齐，枱上净系得一个装住一枝花嘅花樽。
咁究竟系乜嘢奇遇呢？你仲记唔记得半年前我同你讲过，一场暴风雨整烂晒我亲手搭嘅花棚，於是我喊咗成晚，觉得上天好残忍丶好唔公平。点解邻居啲花无事，而我啲花就死晒。
我讲返呢件事出嚟，其实系想同你哋讲，多谢你哋由细到大，努力暗中喺我嘅美丽小世界入面，摆放咗好多好靓同对我有益嘅好人丶好事，同时又帮我筛走咗唔好嘅嘢。我记得十几年前你哋同我讲过，屋企露台嘅小花圃之所以打风都打唔烂，系因为花盆底用铁线扎好，而且你哋专登拣咗个『唔食风』嘅位置摆放佢哋。
另外，唔知你重记唔记得我同你讲过，我到埗嘅第一晚，居然胆粗粗同个陌生人一齐share一程的士。结果去到火车站，嗰个陌生人竟然唔俾车钱，落车走人。嗰时我同你哋讲，我好失望，因为原来呢个世界嘅人系可以咁丑陋，我觉得好无奈。
之後，辅导姐姐同我讲『Prisoner’s Dilemma』。我终於明白，我以前中学嗰阵时同同学相处嗰套，原来唔系喺任何情况都适用。嗰程的士之後，其实双方都肯定唔会再见面，所以佢拣咗defect，而唔系cooperate，又有咩咁出奇呢？谂谂吓，以前自己真系太过天真单纯，对於人际关系唔够充分了解，永远都系一厢情愿，完全唔识留意对方会唔会reciprocate（报答），自己盲目咁推心置腹，跟住自己就失望，然後就只系识喊，喊完之後就继续依恋自己幻想出嚟嘅世界。
讲真，一开头辅导姐姐咁样揭露呢个世界嘅另一面俾我睇，我真系有啲心噏同无奈。但系同佢见多几次之後，佢温柔嘅启导令我嘅感觉慢慢改变，心里面有一种睇透事物然後变得清澄嘅感觉；眼睛雪亮咗，头脑开阔咗，睇清楚咗生活系点样之後，有一种莫名其妙嘅希望感，面对每日嘅生活丶面对未来，都冇再好似以前咁惊。
辅导姐姐教识我，生活要有『章法』。你哋记唔记得，我细个嗰阵，我哋食饭之後成日都打番铺Rummikub先瞓觉。你哋教我，要赢就唔系发脾气要求人哋跟从我嘅规矩，而系要全面洞察游戏嘅玩法，睇通游戏设计者所定嘅规则系点样。当然运气都系好重要，例如抽到『哈哈笑牌』，但更重要嘅仍然系要有章法。不过最重要系要清楚点先算系赢。生活上要『赢』，就系要搵到愿意同你一齐成长嘅人，一齐过健康丶有爱丶有意义嘅生活，细水长流。
呢排我好锺意听“When I Am OIder”呢首歌。我谂真系当一个人成熟咗，就会相信“absolutely everything makes sense”。我以前成日抱怨啲嘢唔make sense，其实只系自己未长大。而辅导姐姐一步步咁带领住我，睇清楚人同事背後嘅道理同前因後果，令我对好多事物都了解多咗。
最後，想问你哋一个问题，你哋睇吓attached file入面幅相，你哋知唔知呢种系乜嘢花？噚日临走前，我忍唔住问辅导姐姐，佢用紧呢套咁劲嘅辅导手法叫咩名。佢只系温柔咁笑一笑，问我∶「个名重要咩？」然後佢望吓枝花，同我讲：「你叫佢做乜嘢花都好，佢嘅芬芳都系始终如一。」
你哋个宝贝女」
(故事细节经修改以保障病人私隐)
撰文∶崔永豪医生
原文刊载於 香港01 「01医务所」
