摆低物件，回眸一望: 花时间搵嘢，最大嘅伤害，唔系浪费时间，而系嗰种激气──「啲嘢转头就唔知去咗边，总之要嗰样，无嗰样！」每日都嬲自己，再加上经常畀人批评无交带丶唔可靠，畀人闹再加上心里面自己闹自己，日积月累，对自我形象嘅伤害，其实十分巨大。所以，解决经常唔见嘢呢个问题，系非常重要嘅。其实之所以唔见嘢，个关键位就在於物件离开手嘅一刻。好多人嘅坏习惯，就系用最短嘅时间将物件放低，然後赶住做另一件事，无预留任何空间，比脑袋记得物件放喺边。从今日起，尝试喺放低物件之後，总系「回眸一望」，好让脑袋可以记低物件嘅位置（回眸，唔系回头，因为回头动作就太大，唔够优雅；回眸，望一眼，就啱啱好）。
同类物件，摆埋一齐: 终於等到上体育堂，终於等到放学後可以打波，可以走出班房活动一下，本来系一件开心事。但好多时最扫兴嘅，就系换衫准备落场嘅时候，发现自己原来带漏野，例如冇拎护胫，落唔到场踢足球比赛；无着排球裤，只可以喺观众席做啦啦队。返学前，明明已经用尽力执齐运动袋，但始终永远都系漏一两样野。咁点样解决呢？就系「摆埋一齐」。要一齐用嘅物件，收纳嘅时候，佢哋永远都要「摆埋一齐」。踢完波之後，护胫立即放喺鞋袋里面，先至离开球场；到第二朝球鞋球袜洗完晾乾之後，即刻放返入鞋袋里面。着上脚嗰三样嘢，永远都要摆埋一齐，放喺个鞋袋里面。每个星期踢波，都系咁样做，直到永远。
储存物件，同一地方:每一个人，不论系返工嘅成年人，定系返学嘅小朋友，每日要用嘅物件，至少都有数十样。要记得每一样物件，例如锁匙丶计数机丶书本及水樽等等放喺边个位置，的确需要耗用脑袋好多能量。每件日常用嘅物件，永远放喺同一个地方，相比起随手随心摆放，表面看来，好似系用多咗时间，亦「好烦」，例如英文书永远要放喺上格，中文课本要放下格，而唔系沟乱随便叠喺书台上。但其实将物件永远放喺同一个地方，咁样喺需要用嘅时候，就唔使谂佢放喺边，省却搵嘢嘅时间，咁就可以准时又轻松咁出门口返学丶准时上到校车（唔使搭的士）丶夜晚又可以早啲瞓觉啦。
撰文∶崔永豪医生
原文刊载於 专注不足/ 过度活跃症（香港）协会FB
