做事，一心一用: 一边上网课丶一边喺手机回覆短讯丶另一边单边耳筒其实听紧podcast，好容易畀我哋有个错觉：以为自己精於multi-tasking，系时间管理达人，沾沾自喜。心谂：「人哋三样嘢，一样还一样轮流做，要用3小时，你睇！我一个钟头，就做晒三样嘢。」但其实，只要有人畀一张白纸你，叫你将头先嘅网课丶听嘅podcast内容写番出嚟，而头先短讯又倾咗啲乜……就会发现，乜都写唔出，一片空白。时间用咗，但系劳而无功，毫无得着，正正系一心多用最大嘅问题。情况有如小朋友嗰版抄书功课，比年幼嘅细佬妹用擦胶擦晒，真系喊都无谓。其实，平日我哋做任何事，包括做功课丶上课丶同人倾偈丶食饭同行路等，都要一心一用，咁样先有得着。另外，一心一用，其实需要我哋动脑筋，每当自己心神想游走嘅时候，俾少少力hold on。正所谓日子有功，我哋嘅专注力，就系咁样练就而成，情况就好似每日用手举哑铃 ，锻炼只老鼠仔一样。希望大家都可以成为专注力嘅大力士。
做事，一击即中: 要喺限定时间内，完成一篇写作功课，或一张数学工作纸；因为自己想做得好，好容易就心急起嚟，尤其系当脑袋开始疲倦，专注力下降时，就更加容易陷入一个困境：匆匆忙忙落笔，然後写错，又要花时间用擦胶丶涂改液去改错，咁样唔单止激气，仲连仅馀嘅时间都消耗埋。欲速则不达（孔子真系冇讲错）！做功课答问题时快而准，大家都想，问题系点先可以做到呢？ 提醒自己，要一击即中。运用之前讲过嘅好习惯，包括将心神都放喺一呼一吸，以平静心神，然後一心一用，脑海里面，有一幅图画：简单如写一个中文字，喺脑海内要有呢个中文字嘅高清画面；写每一笔时，有如一个威风凛凛嘅弓箭手，要全神贯注，有的放矢。先求准确，到一切上轨道後，再求增加速度。
做事，一气呵成: 一篇150字嘅作文，喺课堂上专心做，30分钟就做好，之後体育堂就可以尽情去玩。但系过去一年，在家网上学习，就好容易跌入一个陷阱 ：写两行，然後离开座位，上5分钟社交网站，然後返埋位，又写两行。结果，之前喺学校课堂上，30分钟就可以完成嘅150字作文，而家居然3个钟後都完成唔到。原本谂住做完之後，可以同爸爸落街去踩阵单车，最後都因为做唔切啲功课而被迫取消…… 点解一气呵成系咁重要呢？因为做功课，尤其系写作，好需要喺脑海中构筑思路，思路一被打断，就无可能再流畅地写落去，结果写每一句，以至每一粒字，都搞到举步维艰。着名嘅番茄工作法（Pomodoro Technique） ，建议我哋将工作分成25分钟一件，中间休息5分钟，完成四五件，就休息长啲。 25分钟工作时间，务求一气呵成，无间断。咁样唔单止可以提高效率，亦会好似「一心一用」咁，锻炼自己嘅专注力。
撰文∶崔永豪医生
原文刊载於 专注不足/ 过度活跃症（香港）协会FB
