每日返工返学，人哋对自己有期望有要求，自己对自己，亦都有期望有要求。要处理每日逼到埋身慨压力，就一定要识耍以下2套减压功夫。
不过，喺我地讲呢两套功夫之前，先要明白，我哋每日感受到慨精神压力，其实系啲咩嚟慨呢？
首先，当脑袋将当下一刻慨情况，理解为对自己有威胁慨时候，脑袋内慨警钟，就会响起，身体收到呢个警号，就会释放压力荷尔蒙（包括肾上腺素adrenaline 同皮质醇cortisol） ，令自己进入作战状态，呢个时候，我地就有「受压」慨感觉，包括情绪紧张、焦虑、愤怒；思想慨反应就系大大提高警警觉，不停动脑筋应对当前威胁；身体慨反应就包括心跳呼吸加速、血压上升同肌肉绷紧等等。行为方面，一系就同渠打个，一系就走开逃避，若果预计又打唔赢，又走唔甩慨话，就会吓到个脑hang咗机，成个人呆咗。相信大家每日返工返学，都经历过呢啲身心反应。
强韧慨身心，有助我地处理压力，而强韧慨身心，系可以锻炼返嚟慨。大家试吓每日都做以下两件事，好似人哋日日练功咁样，正所谓日子有功，慢慢就会见到成效。
用眼睛亲亲大自然
有门学科，叫Ecopsychology，系叫人在精神上更接近大自然，以治疗人慨精神痛苦。
在今日慨世界，Ecopsychology 越来越重要，因为我地慨日常生活，越来越多被室内环境、电子产品、以至虚拟世界所占据。明智慨做法，就系主动地积极地恢复与大自然慨联系，以改善我地慨身心健康。
眼睛系灵魂之窗，所以透过我哋慨眼睛，可以有效地帮我哋慨脑袋同大自然联系。医学研究发现，置身于大自然中，用眼看大自然，大自然的光线进入眼睛，能够促进脑袋血清素（serotonin）慨传递，尤其是我地脑袋中掌管理智慨部份，即系我哋脑袋慨前额叶（prefrontal cortex）同埋我哋脑袋慨警钟（即系杏仁核，Amygdala） 之间慨血清素传递，从而令到个警钟可以停落嚟，令焦虑恐慌情绪渐渐消散。脑袋里面，血清素慨传递 对我哋慨情绪系好重要㗎。抑郁症里面，脑袋里面血清素慨传递减弱咗，抗抑郁药，其中一个作用就系促进脑袋里面血清素慨传递，以改善情绪，所以眼睛接触大自然慨光线，就系天然慨抗抑郁良药。
一讲起亲亲大自然，大家就会谂，要返工返学咁忙碌，边度咁多时间去郊外海滩呢？其实我地只要每日吸收一D，积少成多，就能够从大自然中，吸收足够有助于精神健康慨养分。研究发现，每星期累积够120分钟置身于大自然慨时间，就能够明显改善身心健康。
即使身在香港市区，我地仍然可以喺公园，以至喺商业区的公共空间，见到不少树木。我自己就有个习惯，就系戴一副有防紫外线镜片慨眼镜，举头欣赏树叶，以及树叶之间的蓝天白云。返工之前10几分钟，或者午饭期间抽10几分钟，再加埋周末周日多少少时间，咁就累积够一星期120分钟㗎啦。
至于另一套好值得每日都做慨减压功夫，就系腹式呼吸
腹式呼吸练习，就系吸气慨时候肚皮鼓起，呼气慨时候肚皮缩番入去，每一个呼吸都变得深而且慢。
点解肚皮郁动，都居然会影响到我哋慨脑袋慨呢？原因系我地慨神经系统，不仅仅只有脑袋。之前我提到当脑袋判断周遭环境有威胁时，脑袋内慨警钟响起，然后心跳加快，呼吸加速，血压上升，肌肉绷紧，呢D一连串慨反应，是因为脑袋警钟启动咗我哋慨交感神经系统（Sympathetic Nervous System）。而当威胁解除慨时候，就需要副交感神经系统（Parasympathetic Nervous System）采取行动，以减慢返我哋慨心跳同埋呼吸，放松返我哋慨肌肉。呢个交感神经系统，系由我哋慨脑部同埋脊髓，伸延到全身嗰部份。
当我地受到太频繁和太长时间慨威胁，交感神经系统过度活跃，副交感神经系统却太长时间处于休眠状态，这两个功能相反慨系统，就会失去平衡，例如搞到自己即使放咗工放咗学，个人已经离开咗充满压力慨环境，但情绪依然平复唔到过嚟，心跳呼吸仍然系好快，个人心慌慌咁样。
腹式呼吸练习，令到每一次呼吸，都变得好深入，而且缓慢（每分钟6至10次呼吸），令心脏以及肺部探测血压和空气压力慨部份，受到刺激，进而启动副交感神经系统（Parasympathetic Nervous System），帮我地慨身体去放松。
大家可能又会话，返工咁忙，边度有时间做呢啲呼吸练习呢？其实同亲亲大自然一样，每日都做少少，积少成多，就会见到成效。我自己就习惯，最少在早上做10次腹式呼吸，然后晚上再做多10次，咁样，每日都系用大约三分钟慨时间。唔使花好长时间，重点就系每日都做，宁愿时间短啲，都唔好断开有几日冇做。因为咁样系最有效慨方法，去训练我哋慨神经系统。每日都做呢两套功夫，就能够有效咁纾缓我地慨精神压力。
撰文︰崔永豪医生
本文摘自以下影片：
