疫症当前，精神唔好，都唔使问点解。反而，值得研究嘅，就系点解有啲人，仲可以维持到精神唔错嘅呢? 当然个人嘅强韧性格，丰富嘅资源，系重要嘅保护。但呢啲好嘢，唔系话有就有。其实有一样野，我哋系可以即刻去做，成为习惯之後，可以帮到自己好多。
呢样野，就系安排好我哋每日吸取嘅精神食粮。
一个人，饮食如果毫无节制，乜野都食，食到唔知份量，锺意几时食 就几时食，咁样，就当然会食到病。其实每个人，每日嘅食粮，系唔单止用口饮落肚食落肚嘅，仲有另一种系用眼睛睇到，耳仔听到，然後入咗脑袋嘅野，呢个就系精神食粮。 若果我地对於精神食粮，都系唔理好丑，多多都唔拘，无时无刻不断吸收，就肯定会整坏个脑袋。
疫症之中精神压力爆煲嘅人，最常见嘅行为，就系由朝到晚，无间断咁样去睇手机，透过社交网站，不断追睇新闻同埋评论。佢哋唔知道，呢类网站嘅设计，就系针对人类脑袋嘅弱点，用发光嘅萤光幕丶牵动情绪嘅图象丶短片，文字，并透过分析你嘅个人喜好，将资讯，免费咁送上门，好似任食嘅资讯放题 一样。 自动连续播放嘅片段，令人脑部不断追求更多视觉刺激，挑起各种强烈情绪，例如系激动，恐慌，令人觉得睇紧嘅嘢，系生活中唯一值得重视丶唯一有意义嘅嘢。尤其喺夜晚，手机光线会抑制脑袋睡眠嘅功能，令人错误以为自己未眼瞓，可以继续睇落去，结果，就搞到日日都唔够训，管理情绪嘅能力，同埋认知功能，都会大大降低，咁样，返工返学 呢d要专心用精神嘅野，又仲点会有力去做？结果，社会纷乱呢个大环境，好快就同埋个人喺生活丶工作上嘅混乱失意，一齐夹击，结果唔使几耐，压力就爆煲，情绪失控，精神病徵出现。所以呢段期间，能够维持精神健康嘅人，佢哋对於精神食粮，系会好小心丶聪明咁去选择，好自律：限制种类，限制份量，限制时间。
种类方面，新闻资讯固然要睇，但都只系当配菜。主菜，仍然都系呢一个阶段要用心努力去做嘅 实事，可以系工作，可以系学业，可以系照顾小朋友或家人。配菜方面，口味多元化，有各种类嗜好，透过钻研佢哋嘅嗜好，尤其是啲可以单独进行嘅，例如阅读吓历史呀丶文学呀丶科学做到自得其乐。资讯嘅形式，唔单止净系网上影像，佢哋会接触实体物件，例如翻开一本书 整手工艺 亲身去接触花草树木。总之 唔会独沽一味上网或者手机。
分量方面，一定要有节制，限住时间去睇，如果唔系，一定会越睇越多，追住睇，因为呢个系 脑袋接触发光画面嘅自然反应。要将手机应用程式嘅提示功能，熄咗佢，用电脑做公司野或者做功课嘅时候，浏览器就唔好开社交网体或者新闻网页。总之眼睛要避开诱惑，避免心思思。
时间方面，睇手机，睇新闻，只系日头睇，入夜後，手机就放喺一个唔可以随时望到嘅地方，有唔少人，系专登另外买个闹钟，以防自己夜晚临训喺手机校闹钟嗰时，又忍唔住睇短讯睇新闻。
希望大家，由今日开始，管理好自己吸收 嘅精神食粮。
撰文∶崔永豪医生
视频版本於 思健学院频道
