拖延，人之常情也。但拖延最大嘅代價，就係令到一啲明明自己想完成、亦都有能力去完成、同埋好有價值嘅事，遲遲都完成唔到。好多專注力尚未發育成熟嘅小朋友，每次佢哋面對一件需要持久心力嘅事，例如做功課，腦袋就會卻步，同時又瞬間彈出好多可以講係重要 (Important) 但又唔急切 (Not urgent) 嘅事。
例如打開數學練習簿，正當準備填上第一個數字時，就諗起重要（但其實唔急切）嘅事，好似上網查一查今日世界各地新增肺炎個案數目，或者檢查屋企電器嘅能源標籤。呢啲事，對全世界嘅重要性，的而且確係可能比我嗰條數學題更加重要，但若論到急切性，就應該係呢一份數學功課較為急切。所以，我哋要培養一個好習慣：搞清楚事情嘅緩急先後。做事嘅先後次序好重要，先做功課後打機，同先打機後做功課，兩者對學業成績嘅影響，可謂天淵之別。 成日要問自己，喺呢一刻，乜嘢先至係我嘅第一急切任務？要清楚乜嘢係第一任務，一個好嘅方法，就係自己先定立Task list（喺紙上面，只列出呢三項任務；做完1️項後，就用筆刪去一項，全部完成後，就可以將呢張紙送到垃圾筒）。List上嘅任務都完成晒之後，就可以輕鬆一下，慶祝一下。
撰文︰崔永豪醫生
