拖延，人之常情也。但拖延最大嘅代价，就系令到一啲明明自己想完成丶亦都有能力去完成丶同埋好有价值嘅事，迟迟都完成唔到。好多专注力尚未发育成熟嘅小朋友，每次佢哋面对一件需要持久心力嘅事，例如做功课，脑袋就会却步，同时又瞬间弹出好多可以讲系重要 (Important) 但又唔急切 (Not urgent) 嘅事。
例如打开数学练习簿，正当准备填上第一个数字时，就谂起重要（但其实唔急切）嘅事，好似上网查一查今日世界各地新增肺炎个案数目，或者检查屋企电器嘅能源标签。呢啲事，对全世界嘅重要性，的而且确系可能比我嗰条数学题更加重要，但若论到急切性，就应该系呢一份数学功课较为急切。所以，我哋要培养一个好习惯：搞清楚事情嘅缓急先後。做事嘅先後次序好重要，先做功课後打机，同先打机後做功课，两者对学业成绩嘅影响，可谓天渊之别。 成日要问自己，喺呢一刻，乜嘢先至系我嘅第一急切任务？要清楚乜嘢系第一任务，一个好嘅方法，就系自己先定立Task list（喺纸上面，只列出呢三项任务；做完1️项後，就用笔删去一项，全部完成後，就可以将呢张纸送到垃圾筒）。List上嘅任务都完成晒之後，就可以轻松一下，庆祝一下。
撰文︰崔永豪医生
