電話響起。甲：「喂，搵我咩事？」乙：「你聽得清唔清楚啊？」甲：「清楚啊。」乙：「我而家買緊個新嘅電話藍牙免提，聽得清楚嗎？」甲：「好清楚喎。」乙：「冇嘢啦，唔該晒。」
手機彈出短訊。甲：「麻煩你，你有冇XX信用卡？」乙：「有啊。」甲：「我想麻煩你幫我買張演唱會飛，你張信用卡有得優先預訂喎。」乙：「你想買幾多張飛？」甲：「買一張，我自己一個人去，唔該晒」乙：「好啊。」
甲：「下個月最尾個星期五下晝，有個頒獎典禮，我可以同一個人去，你得唔得閒啊？」乙：「噢，咁啱嗰日我要主持個會。」甲：「Okay，我到時影多啲相，之後send畀你睇啦。」
乙：「喂，即興，聽日不如我哋北上打邊爐，有冇時間陪我去？」甲：「好啊。你得唔得早啲一齊上去，陪我配埋副眼鏡？」乙：「都OK啊。」到出發當日。甲：「唔好意思，我好朋友突然間好唔開心，我要陪一陪佢。」乙：「冇問題，咁你陪吓個朋友先啦。」
阿甲阿乙之間，想起對方時能即興聚會，突然有事時，又能夠開心見誠地取消約會。不論大件事或小事幹，都能夠沒顧忌地提出，坦誠表示yes或no，不害怕彼此誤會對方「不尊重我」或者「搵我攝時間」。能夠共享快樂，互相幫忙，自然流露出包容及體諒，大家皆輕鬆自在。
生活在一個節奏緊湊、每人同時兼顧眾多角色的環境，有這種充滿安全感的緊密聯繫，不管父母與子女、親密伴侶還是朋友之間，都真是一份難得的福氣，猶如擁有一個能緩衝精神壓力的咕𠱸，以及時常能服用的精神健康清涼劑。
撰文︰崔永豪醫生
原文刊載於︰信健康
