疫症當前，精神唔好，都唔使問點解。反而，值得研究嘅，就係點解有啲人，仲可以維持到精神唔錯嘅呢? 當然個人嘅強韌性格，豐富嘅資源，係重要嘅保護。但呢啲好嘢，唔係話有就有。其實有一樣野，我哋係可以即刻去做，成為習慣之後，可以幫到自己好多。
呢樣野，就係安排好我哋每日吸取嘅精神食糧。
一個人，飲食如果毫無節制，乜野都食，食到唔知份量，鍾意幾時食 就幾時食，咁樣，就當然會食到病。其實每個人，每日嘅食糧，係唔單止用口飲落肚食落肚嘅，仲有另一種係用眼睛睇到，耳仔聽到，然後入咗腦袋嘅野，呢個就係精神食糧。 若果我地對於精神食糧，都係唔理好醜，多多都唔拘，無時無刻不斷吸收，就肯定會整壞個腦袋。
疫症之中精神壓力爆煲嘅人，最常見嘅行為，就係由朝到晚，無間斷咁樣去睇手機，透過社交網站，不斷追睇新聞同埋評論。佢哋唔知道，呢類網站嘅設計，就係針對人類腦袋嘅弱點，用發光嘅螢光幕、牽動情緒嘅圖象、短片，文字，並透過分析你嘅個人喜好，將資訊，免費咁送上門，好似任食嘅資訊放題 一樣。 自動連續播放嘅片段，令人腦部不斷追求更多視覺刺激，挑起各種強烈情緒，例如係激動，恐慌，令人覺得睇緊嘅嘢，係生活中唯一值得重視、唯一有意義嘅嘢。尤其喺夜晚，手機光線會抑制腦袋睡眠嘅功能，令人錯誤以為自己未眼瞓，可以繼續睇落去，結果，就搞到日日都唔夠訓，管理情緒嘅能力，同埋認知功能，都會大大降低，咁樣，返工返學 呢d要專心用精神嘅野，又仲點會有力去做？結果，社會紛亂呢個大環境，好快就同埋個人喺生活、工作上嘅混亂失意，一齊夾擊，結果唔使幾耐，壓力就爆煲，情緒失控，精神病徵出現。所以呢段期間，能夠維持精神健康嘅人，佢哋對於精神食糧，係會好小心、聰明咁去選擇，好自律：限制種類，限制份量，限制時間。
種類方面，新聞資訊固然要睇，但都只係當配菜。主菜，仍然都係呢一個階段要用心努力去做嘅 實事，可以係工作，可以係學業，可以係照顧小朋友或家人。配菜方面，口味多元化，有各種類嗜好，透過鑽研佢哋嘅嗜好，尤其是啲可以單獨進行嘅，例如閱讀吓歷史呀、文學呀、科學做到自得其樂。資訊嘅形式，唔單止淨係網上影像，佢哋會接觸實體物件，例如翻開一本書 整手工藝 親身去接觸花草樹木。總之 唔會獨沽一味上網或者手機。
分量方面，一定要有節制，限住時間去睇，如果唔係，一定會越睇越多，追住睇，因為呢個係 腦袋接觸發光畫面嘅自然反應。要將手機應用程式嘅提示功能，熄咗佢，用電腦做公司野或者做功課嘅時候，瀏覽器就唔好開社交網體或者新聞網頁。總之眼睛要避開誘惑，避免心思思。
時間方面，睇手機，睇新聞，只係日頭睇，入夜後，手機就放喺一個唔可以隨時望到嘅地方，有唔少人，係專登另外買個鬧鐘，以防自己夜晚臨訓喺手機校鬧鐘嗰時，又忍唔住睇短訊睇新聞。
希望大家，由今日開始，管理好自己吸收 嘅精神食糧。
撰文︰崔永豪醫生
視頻版本於 思健學院頻道
