當疫情過後，第一件事 你想做啲乜嘢？相信有啲人，而家諗緊嘅，即刻離婚。佢哋有一種 好似，頓悟嘅感覺。覺得，自己終於睇清睇楚，枕邊人嘅真面目，原來有 幾咁醜陋、無能、固執 同自私。每日大家 困喺屋企，各種谷氣嘅事，都加深大家 各行各路嘅決心。就算未係去到咁極端，有啲人，都唔係好明白，點解疫情令到自己嘅丈夫、太太，會咁乞人憎。
原因係，大自然塑造我哋人類嘅腦袋，首要任務就係 求生。所以當人身處喺一個 陌生 而又有潛在危險嘅情況，就自然會 不安 恐懼，令我哋走入咗 被害嘅思想模式。任何野走埋嚟嘅時候，當唔清楚係乜，都先當咗係 有敵意 同危險嘅野先；總之，有殺錯，無放過。而今次嘅肺炎疫情，就正正係 會帶來生命危險 而又完全陌生嘅野， 所以就令人 十分不安 同恐懼。
所以，同一屋簷下嘅人，困係狹窄嘅地方，單單係用廁所，都足以令大家 互相仇恨。硬係覺得佢係專登係你 最急嘅時候，佢就喺廁所裏面玩多陣手機。或者覺得自己嘅伴侶，利用防疫做藉口，乘機唔俾我出街，驚我出去勾三撘四。跟住又諗: 如果咁驚我 搵過另外一個，點解 你平時又唔對我好啲..。總之，硬係要諗到佢 要幾衰，有幾衰。
喺不安恐懼嘅時候，另一種思想模式，就係: 只着眼於呢一刻 欠缺嘅，唔好嘅嘢，對於好嘅，宜家擁有嘅嘢，就視而不見。小朋友要網上學習， 10張工作紙，只係有4張做咗，眼睛只會睇到空白嗰6張，然後諗，梗係老公偷懶 專登唔做，又或係覺得 老婆唔肯用腦，甚至係 老婆根本冇腦。
你有冇趺入咗 呢啲思想陷阱呢？其實 都有唔少夫婦，喺呢幾個月，感情係有增進。呢啲 有智慧嘅夫婦，最常用嘅，有4個技巧，結果，就避開咗 頭先我所講嘅 人類腦袋天性 所引來嘅陷阱。
第一，疑點利益 歸於被告。例如，叫咗佢做，結果佢冇做到。除非有 充足嘅證據，證明佢係 有能力 但係蓄意唔去做，否則 就唔好亂咁安個罪名俾佢，控訴佢 玩挑釁，搞作對。冷靜問吓自己，究竟係佢不為，定係不能呢?
第二，提醒自己，數下有啲乜嘢係 宜家擁有緊嘅，而唔係 吓吓都數住 自己有乜嘢係 欠缺嘅: 提醒自己，其實 已經有四張工作紙做好咗。如果唔係太太督促小朋友，呢4張工作紙，仍然會係空白。先着眼於 擁有嘅野，自然自然 就會諗多一層，問 : 係邊個出咗力嘅呢？感恩嘅心，就係咁樣培養出嚟㗎啦。
第三，俾啲笑容。人類嘅腦袋，係啱啱出世，仲係BB時，係先有 人面辨識嘅能力，之後 先有說話溝通能力。尤其是喺焦慮嘅時候，更加傾向透過 人嘅面容，而唔係 口講嘅說話，去了解周圍嘅人嘅意圖。板起塊面，對於一個着緊你、重視你嘅人，好容易就理解為：『你唔妥我』，久而久之 就會搞到 : 既然你唔妥我，我都唔妥你！俾個笑容吖，笑容提提大家，我即使冇乜時間俾到你，但我仍然喜愛你。
第四，當珍貴嘅嘢，出現問題嘅時候，係諗住整返好佢，唔係掉咗佢。唔單止對婚姻，對健康都係。健康出現問題，係諗住 醫番好佢，唔係即刻諗 醫番都嘥藥費，唔會即刻放棄。佢哋唔會幼稚到以為 配偶換過另一個，下個 必定更可愛。
希望大家透過呢4招，令到 頭腦保持清醒，唔好諗錯野，唔好睇錯野，做到 珍惜枕邊人，唔好趕走最愛惜你嘅人。做到二人同心，其利斷金。疫情係一時嘅，關係係一世嘅。
撰文︰崔永豪醫生
視頻版本於 思健學院頻道
