Z先生的抑鬱焦慮仍是久醫不癒。表面睇，他的工作是一份筍工，不是私人機構，不需要跑數。但每次複診，他都愁眉深鎖，唉聲嘆氣。多年來，他每日每晚都反覆思量，不斷鑽研一門高深學問，就是如何令自己的老細稱心滿意。他立志窮盡畢生精力，去掌握一種技術──單憑肉眼就能看穿老細心中想要什麼，不單止要令老細「想嗰樣就得嗰樣」，更加要將老細心中的「潛在」願望發掘出來，然後一一滿足，以求在工作表現評鑑中，達到最高的級別。但當每晚夜闌人靜時，腦海中就會充斥着老細搖頭、黑口黑面的情景：「唔係咁做呀！」「總之再做過啦！」，這些畫面及說話，一刀一刀劈下來，令他心驚膽戰，難以入眠。
排隊取藥時，前面的一個男人轉身離開時，十多包藥掉在地上，狼狽不堪。Z先生幫這個男人執起藥物，「老細！」原來這個男人，就是他的老細Y先生，原來他都在這裏複診。Z先生很尷尬，很驚，這位Y先生的面容更尷尬，更驚慌。「又不是玉帛相見 ，尷尬乜呢？ 又不是我碰跌佢啲藥，我又驚乜呢？」Z先生運用認知行為治療的技巧，克服腦海裏面即時出現的負面失實想法。
到傍晚時，兩人留在辦公室，傾談了很久。身為「老細」的Y先生不斷道歉， Z先生初時感到渾身不自在。「很多時，其實我都唔知道我嘅老細想要乜，所以無論你做到幾好，我都係唔滿意，我淨係識叫你再做過，但係我從來唔識教你實際上要點做，做成點，真係對唔住。」Y先生鼓起勇氣向Z先生告解。「其實大家都係食物鏈嘅底層，一級級咁上，老細之上又有老細。總之，老細心，海底針啦。」Z先生來個黑色幽默。「大海撈針都有撈到嘅一日，我覺得要估中大老細諗乜，簡直係鏡花水月。老細都係諗緊佢老細個老細其實諗緊啲乜㗎啦。。。。。。迫自己去找到一些根本不存在、虛妄的東西，只會逼死自己，仲會殃及別人。」Y先先生露出得戚的樣子說。
幾個月來，兩人工餘時一起行山，感受大自然的壯麗，並且修習佛學。漸漸，眼界開闊了，有了洞察力，走出死胡同。「邊個係老細？」「係我們服務嘅每一個男女老幼。」「逆地而處，覺察佢哋嘅需要，盡力去做，其實可以達到。」「我哋真係低級職員？」「越前缐，越能夠直接服務有需要嘅人，越有意義。」「我哋嘅工作好有意義，即使永遠唔能夠盡如人意。」兩人每日都有很多智慧對話。他們不走極端，不會「逢老細必反』，不會以嘲笑上級來舒緩工作的委屈感。不介意職級高低，自己作為所有職級同事的榜樣，對事不對人，實事求是，諒解各人的難處，提醒自己以及身邊的人，工作的意義。
(故事細節經修改以保障病人私隱)
撰文︰崔永豪醫生
原文刊載於 香港01「01醫務所」
